रॉक्सेट या स्वीडिश बँडच्या माध्यमातून मरी फ्रेड्रिकसन यांनी तरुणाईला शुद्ध रॉक संगीताची भुरळ घातली. अलीकडेच त्यांचे निधन झाले. त्यानिमित्त त्यांचा हा अल्प परिचय....
.....
मरी फ्रेड्रिकसन यांचा जन्म १९५८साली गोस्टा आणि इनेज या दाम्पत्याच्या पोटी एस्जा या छोट्या स्वीडिश खेड्यात झाला. ती चार वर्षांची असताना, तिचे पालक ऑस्ट्रा झुंगबी येथे गेले. तिथे मरीला बीटल्स, जोनी मिशेल, जिमी हेंड्रिक्स या गायकांच्या गाण्याची गोडी लागली. वयाच्या सतराव्या वर्षी एका संगीत शाळेत तिने प्रवेश घेतला. तिथे तिने नाट्य विभागातील विद्यार्थ्यांच्या हौशी नाटकांसाठी संगीत दिले. हळूहळू तिने स्वत:च्या स्वरावली आणि शब्दावलींच्या आधारे देशातील विविध संगीत समूहांमध्ये उमेदवारी सुरू केली.
दरम्यान, पर गेस्ले या स्वीडनमधील गिटारवादकाशी तिची ओळख झाली आणि या दोघांनी १९७८ मध्ये रॉक्सेट या बँडची स्थापना केली. एक तपामध्ये या बँडने द लुक, जॉयराइड, इट मस्ट हॅव बीन लव्ह, लिसन टू युवर हार्ट अशी वेड लावणारी गाणी तयार केली. यातल्या ‘द लुक’ या गाण्याची नव्वदच्या दशकात बॉलिवूडमध्ये दुनिया में जिना है तो ...आणि दिल में कुछ होने लगा..अशी दोन गाणी तयार झाली.
पश्चिमेत मायकेल जॅक्सन आणि आपल्याकडे बप्पी लाहिरींच्या डिस्को बीट्सचा धुमाकूळ सुरू असण्याच्या काळात रॉक्सेट या स्वीडिश बँडचे शुद्ध रॉक संगीत उदयाला आले. इलेक्ट्रिक गिटारवरील धून, कोरसचा वापर आणि ध्वनिमुद्रण तंत्रात झालेल्या प्रगतीचा गाणी फुलविण्यासाठी केलेला योग्य वापर यामुळे या बँडने एकापेक्षा एक हीट गाण्यांचा धडाका लावला. मरी फ्रेडरिक्सन यांचे नाव या बँडची गायिका म्हणून युरोप आणि अमेरिका खंडात गाजू लागले.
२००२ मध्ये मरी फ्रेडरिक्सन यांना मेंदूचा असाध्य आजार जडला; पण खचून न जाता आजारावर मात करण्यासाठी नवे संगीत करण्याचा मार्ग त्यांनी वापरला. आजारपणातही त्यांनी तीन नवे अल्बम तयार करीत शैलीसंपन्न गाणी सादर केली. अशा या गुणी गायिकेचे वयाच्या ६१ व्या वर्षी ९ डिसेंबर २०१९ रोजी निधन झाले. जगभरातील संगीत-वर्तुळात त्यांच्या निधनाबद्दल हळहळ व्यक्त झाली.
- अरविंद जोशी